Queres amosará en Santiago o potencial da ferramenta libre Ephesoft na captura intelixente de documentos

O software libre non ten límite. Son innumerables as actividades de difusión e promoción que se están a levar a cabo na nosa terra, ben sexa a nivel xenérico (vantaxes da programación aberta en calquera eido de actividade), ben sexa a nivel concreto de dar a coñecer algunha ferramenta ou servizo. Neste último eido é onde se insire unha nova actividade a apuntar na nosa axenda: a xornada demostradora de Queres Tecnoloxías para dar a coñecer o servizo de captura intelixente de documentos con software libre, Ephesoft. A finalidade do evento é amosar aos asistentes a que sería a primeira solución de código aberto para a dixitalización e captura intelixente de documentación e a súa integración co sistema de xestión Alfresco.
Segundo informa Mancomún, Queres é socia de ámbolos dous produtos produtos, Alfresco e Ephesoft. A xornada dará comezo cun achegamento ao significado do concepto de “captura intelixente de documentos”. Segundo avanza a empresa, este proceso é algo máis ca un simple escaneado ou transformación de material escrito ou gráfico en formatos dixitais. O que se pretende, con esta metodoloxía, é engadir a capacidade de extracción de datos e clasificación automática dos documentos para poñelos a disposición doutros sistemas de información da empresa. A xuízo de Queres, estamos a falar dun tipo de traballo de especial importancia para calquera calquera empresa ou administración, afeitas como están todas elas (en maior ou menor medida) a xestionar e manexar importantes cantidades de datos, non sempre dixitais, co obxectivo de rexistralos e acubillalos ao abeiro de novos formatos. Polo tanto, de haber solucións efectivas que permitan unha axilización importante deste traballo, que ademais sexan programas abertos e que acheguen medidas reais de seguridade, serían acollidas cos brazos abertos. Cara a isto diríxese precisamente Ephesoft, que é unha solución de baixo custe que elimina os custes baseados no número de follas. “Son moitas as compañías que están a migrar a un contorno completo composto por OCR, clasificación de documentos e extracción de campos en documentos non estruturados”, informa Queres. Durante esta xornada demostradora, revisarase a última versión de Ephesoft, a súa integración con Alfresco para almacenar a documentación. Tamén haberá demostracións prácticas de casos de uso reais amosando como é o proceso de captura e extracción de información das facturas dos provedores e a captura de documentación do empregado. Durante a xornada participarán tamén expertos nacionais e internacionais en Ephesoft e Alfresco.