R leva redes ultrarrápidas aos parques empresariais de Boqueixón e Teixeiro
mércores, 12 de decembro do 2018
- O polígono de Boqueixón nunha imaxe de GM para El Correo Gallego
Continúan
os fornecementos tecnolóxicos do Plan
de Banda Larga da Xunta, do que a
firma R é adxudicataria, destinados a implantar redes
ultrarrápidas nos polígonos que non dispoñen delas. Entre as
contornas industriais onde se veñen de estrear este mes de novembro
os novos equipamentos de FTTH (Fiber To The Home) figuran os
parques empresariais de Boqueixón e Teixeiro, os dous na provincia
da Coruña, o que implica que unha vintena de empresas das ditas
contornas industriais dispoñen xa de acceso a Internet con
velocidades de até 350 Mpbs.
Segundo
informa R, estas mesmas tecnoloxías chegaron tamén (previamente) a
unha ducia de superficies empresariais coruñesas: os recintos
empresariais de Arzúa, Betanzos, Coirós, Culleredo, A Laracha,
Malpica de Bergantiños, Melide, Narón, Oleiros, Ordes, Oroso,
Padrón (A Picusa, A Picaraña e Cortizo), A Pobra do Caramiñal,
Ponteceso, As Pontes de García Rodríguez (Penapurreira e Cruz das
Cabezas), Rianxo, Sada, Santa Comba, Vimianzo, Noia, Cerceda, As
Somozas e Muros. Todos eles están xa conectados a redes
ultrarrápidas de Internet, de xeito que son 28 os polígonos
coruñeses beneficiados polo Plan dende que comezaron as actuacións
en 2016.
A
operadora R tamén lembra que os polígonos acabados de de beneficiar
poden contratar servizos de Internet a través de fibra óptica
cunhas velocidades de até 350 Mbps de baixada e 35 de suba, e cunha
garantía de caudal do 80% sen límite de descargas.
R recordou
tamén que, en virtude dos ditos equipamentos, pon a disposición das
empresas dos polígonos “a tecnoloxía precisa para acometer a súa
transformación dixital”. Ou sexa, servizos e solucións na nube
como por exemplo a videoconferencia, o acceso á Internet das Cousas
(IoT) ou os procedementos do que se coñece como Industria 4.0,
vencellados a conceptos e metodoloxías como a eficiencia enerxética,
o control de intrusións nas edificacións, os servidores virtuais e
a analítica de datos (Big Data), entre outros eidos. “Todas
estas cousas e outras moitas máis”, explicou a compañía de
raizame galega, “son posíbeis grazas ás vantaxes das redes FTTH
(Fiber To The Home) que levan a fibra óptica ata a propia
empresa nestes polígonos xa conectados ás redes ultrarrápidas de
R”.
Prazos
e orzamento
O
Plan xa completou o despregue en 81 polígonos da Comunidade. En
conclusión, en 2018 un total de 130 polígonos (concentrando case o
93% da superficie empresarial ocupada) disporán de acceso a redes de
máis de 100 Mpbs. Estes despregues supoñen un investimento total de
5,2 millóns de euros, dos que 3,4 son subvencionados pola AMTEGA e
co-financiados ao 75% polo Fondo Europeo Agrícola de Desenvolvemento
Rural (FEADER) no marco do Plan de Desenvolvemento Rural de Galicia
2014-2020 (PDR).