R levará a súa fibra óptica a 5.800 fogares e empresas de Noia
martes, 29 de xullo do 2008
Quen pasara por Noia estes días saberá do que
imos falar: do despregue da fibra óptica do operador
galego R. Os traballos, que obrigaron durante semanas a desviar certo
volume de tráfico procedente de Santiago (achegando algún que outro
embotellamento extra), semella que
van chegando a bo porto. Segundo informa a empresa de telecomunicacións, van
ser 4,2 millóns de euros os que se invistan nesta tarefa de equipamento en
concreto de fibra óptica, infraestrutura que estará (probablemente en novembro)
ao alcance de 5.800 fogares e empresas do concello. O proxecto, que foi
presentado polo miúdo esta mañá polo propio alcalde de Noia, Rafael García
Guerrero e máis polo conselleiro delegado de R, Arturo Dopico, achega arestora
servizos dixitais a uns 300 fogares e empresas de Noia, concretamente da zona
de Virxe do Mar.
En breve agárdase que a cifra medre un bo cacho:
até os devanditos 5.800 clientes potenciais. Sinalar que este servizo de fibra
óptica, como nos outros concellos que xa forman parte da rede de R, levará
servizos integrados de teléfono, internet de alta velocidade, televisión
dixital e móbil. “Arestora”, informa a operadora, “estanse a executar as obras na avenida de Galicia e agárdase que estas
continúen tralo verán no Malecón e nas rúas Porta da Vila, Escultor e Ferreiro”.
O proxecto inclúe o equipamento de case nove quilómetros de obra civil e máis
de cinco quilómetros de fibra.
Na imaxe, un rúa do centro de Noia vista no caderno de Molineli.