Richard Stallman chega á nosa terra para impartir relatorios en Vigo, Ourense e Coruña

Para quen ande despistado e pense que a nova edición viguesa do congreso MeTTeG xa rematou, dicirlle que nin moito menos e que na tarde deste luns imos ter a que ben poderiamos considerar actividade estrela desta sétima edición: un relatorio presidido por quen para moitos seareiros do coñecemento libre representa en boa medida a súa faciana máis visible e un das súas grandes figuras referenciais. Falamos de Richard Stallman, que está hoxe en Vigo para falar de O software libre a Administración Dixital. no Centro Cultural Novacaixagalicia, a partir das 19.00 horas e con entrada libre. Ademais, o martes estará en Ourense e o xoves na Coruña.
Volvendo á cita de Vigo, dicir que Stallman afondará nas oportunidades que o código aberto ofrece aos gobernos (maior autonomía informática, un menor investimento) e falará da nosa responsabilidade, e dos nosos gobernos, á hora de promover nós mesmos recursos que estean a disposición dos demais, libremente.
Como dixemos, Stallman aproveitará a súa estadía en Galicia para ofrecer ao día seguinte un relatorio no campus de Ourense, no salón de actos do Edificio Politécnico, onde falará sobre Unha Sociedade Dixital Libre. Asemade, intervirá o vindeiro día 11 na Coruña, na Facultade de Informática, achegando o relatorio O software libre na ética e na práctica, ás 16.00 horas e, tamén, aberta ao público en xeral e de balde.
Como dixemos, a cita deste luns insírese no congreso MeTTeG. A edición desta xuntanza, a sétima, comezou a desenvolverse o pasado mes de outubro, no Hotel Bahía de Vigo, onde contou diversos relatorios sobre Administración Dixital, as cidades intelixentes, os datos en aberto e máis a seguridade e privacidade das comunicación. Lembrar que MeTTeG vén da man dos investigadores do Grupo de Enxeñaría de Sistemas Telemáticos co soporte do Concello de Vigo e a Rede Galega de Procesamento da Linguaxe e Recuperación da Información.
Trátase da segunda vez que este congreso se celebra en Vigo, tras unha anterior edición na cidade en 2009 que tivemos ocasión de reflectir en Código Cero facendo fincapé nos éxitos e nas eivas que daquela estaba a amosar o proceso de dixitalización das institucións públicas e as súas canles de comunicación coa cidadanía.