Santiago acolle este mércores un debate sobre a futura Asociación de Empresas Galegas de Software Libre

A deste mércores 23 vai ser moi probablemente unha xornada decisiva para o futuro das firmas galegas vinculadas ó software libre, sobre todo para saber ata que punto van camiñar xuntas no futuro. Así, segundo informa Javi Vázquez no seu blog, a sede da Escola Técnica Superior de Enxeñería (ETSE) de Santiago vai acoller a partir das 17.30 unha xuntanza de empresas da nosa terra interesadas na posta en marcha do que sería a Asociación de Empresas Galegas de Software Libre. Na reunión está previsto que se expoñan os obxectivos xerais do hipotético colectivo e máis as opinións ó respecto de cada un dos presentes.
Asemade, fará acto de presenza Dani Armendáriz, presidente da Asociación de Empresas de Software Libre de Euskadi, que falará da súa experiencia e das posibles ligazóns coa futura entidade galega.
A idea dos organizadores do encontro é que a xuntanza de hoxe se desenvolva seguindo os principios que fixeron posible o movemento do software libre: incluíndo na mesma a todos os interesados e fomentando no posible a participación e o intercambio de opinións.