Super Mario quere marabillarnos co seu novo xogo

Os amantes das aventuras de Mario máis tradicionais están de parabéns, pois chega a Nintendo Swith o agardado Super Mario Bros. Wonder, un novo xogo de desprazamento lateral en 2D que demostra unha vez máis que Nintendo sabe manter frescos os seus xogos de plataformas, incorporando moitas novidades para goce dos incondicionais deste xénero, que conta con moi poucos títulos, de aí que sexa especialmente de agradecer que o lanzamento dun novo Mario tradicional estea cheo de sorpresas.
En Super Mario Bros. Wonder visitamos o Reino Flor, onde está a espallarse o poder da Flor Marabilla, facendo que acontezan cousas extravagantes e marabillosas, como tubaxes que se moven soas, hipopótamos que aparecerán dando botes ou incluso que Mario conte con abraiantes transformacións, sendo a máis destacable na que se converte en Elefante, cunha trompa que pode destruír bloques, atacar aos inimigos e incluso almacenar auga e logo regar con ela. Mario tamén poderá converterse nunha especie de trade para soterrarse e así poder atacar por abaixo a inimigos blindados ou espiñosos, ou evitar os perigos; e incluso tamén será quen de lanzar burbullas que poden atrapar a inimigos ou poden empregase como plataformas para chegar a lugares de difícil acceso.
O xogo tamén conta cunha ducia de personaxes xogables e modos de xogos cooperativos en local e en liña de entre 2 e 4 xogadores. Un imprescindible para Switch, que ten todas as papeletas para ser considerado o mellor título para esta plataforma na segunda metade do ano.