Tegnix representará ao eido galego do software libre en LibreCon 2014

As tecnoloxías abertas serán o tema central de LibreCon, que nesta edición 2014 vén da man da federación española ASOLIF e a plataforma éuscara ESLE, que conta co apoio de empresas punteiras do sector como Red Hat, Alfresco, Irontec, Euskatel, Lanbide, Zimbra e Finodex, ás que cómpre engadir o apoio do Goberno Vasco, a Deputación de Biscaia, a Deputación de Guipúscoa, o Concello de Bilbao ou CENATIC. A cita será no Palacio Euskalduna e artellarase en base a conferencias, casos de éxito, demostracións, charlas e obradoiros, coas últimas tendencias do sector das tecnoloxías abertas. LibreCon 2014 recolle a testemuña das tres edicións anteriores da Libre Software World Conference (LSWC), a edición 2012 celebrada en Santiago. En canto á presenza galega, sinalar que o 11 de novembro intervén Tegnix.
A galega empresa estará representada polo seu xerente Carlos Rodríguez, quen achegará a conferencia titulada Implantación de novas tecnoloxías con software libre en aulas (proxectos Abalar e CeMIT) sobre as tecnoloxías e procedementos introducidos na área de administración de sistemas para os proxectos Abalar (75.000 equipos) e Rede CeMIT (1.500 equipos), ambos pertencentes á Xunta de Galicia.
A presenza internacional en LibreCon estará protagonizada por administracións como o Concello de Múnic, co seu proxecto LiMux, que axudou á cidade alemá a aforrar 11 millóns de euros; ou a Xendarmería francesa, coa migración de solucións de computación e ofimática libres máis grande da historia, ou a comparecencia de Jim Whitehurst, CEO de Red Hat. Alén destas participacións, tamén acudirán organizacións como Amnistía Internacional España, con arredor de 65.000 membros e 1.800 activistas, que amosará a súa xestión coa plataforma CiviCRM. Amais disto, concorrerán empresas como Atrapalo.com, “un dos maiores comercios electrónicos do sector turístico e lecer, que presentará como as tecnoloxías abertas son a chave en determinadas áreas do negocio”, explica a organización, que engade que tamén se contará con startups como como CartoDB, que dará conta de “como converteron o seu modelo baseado en software libre nunha empresa de éxito capaz de captar o interese de investidores e clientes”.