Telefónica fortalece o seu servizo de rede móbil nos puntos máis turísticos da nosa terra
mércores, 8 de xullo do 2015
- Malpica de Bergantiños atópase entre os destinos turísticos en cuxa rede móbil Telefónica achegará melloras
A operadora Telefónica,
con vistas á tempada estival na que estamos plenamente mergullados,
está a fortalecer a súa rede móbil nos enclaves e contornas
turísticas da nosa terra. Para acadalo, aumentou a capacidade das
estacións base ligadas a estas áreas coa finalidade de atender ao
máis que previsíbel medre na demanda de servizo (voz e datos) coa
chegada masiva de visitantes. O
investimento do plan posto en marcha nesta comunidade autónoma
sitúase arredor do millón de euros.
A iniciativa insírese no
Plan Especial de Capacidade de Verán habilitado por Telefónica a
finais de xuño nas principais contornas turísticas galegas,
abranguendo traballos en Carballo, Malpica, Sada, Betanzos, Cedeira,
Ortigueira (sobre todo con motivo do festival de música celta), A
Coruña, A Mariña de Lugo, O Val Miñor, O Morrazo, O Salnés e
Vigo, así como noutros puntos de especial interese turístico do
interior de Ourense e A Coruña.