TextMate 2 para OS X adopta a licenza GPL 3

O editor de texto para Mac OS X TextMate, ata o momento á venda por 45,63 euros e dispoñible en versión de proba, atendendo ás limitacións para os desenvolvedores que Apple incorporou co lanzamento de Mountain Lion transformouse nunha aplicación de código aberto para que os seus cada vez máis usuarios poidan empregala, estando xa dispoñible o código fonte de TextMate 2 en GitHub.
O autor da aplicación, Allan Odgaard, optou publicar o seu editor de texto baixo a licenza GPL 3, garantindo así que non aparezan versións da mesma baixo código pechado (aínda que no caso de que alguén desexe aproveitar parte do código nunha aplicación de pagamento é posible chegar a un entendemento con Odgaard).
Temos aquí un claro exemplo de que a adopción do código aberto non é unha cuestión de gratuidade senón de liberdade, que nesta ocasión chega como resposta a unha serie de restricións para os programadores que Apple incorporou ao seu sistema operativo para incrementar a súa seguridade e facilitar o seu manexo por parte de usuarios finais, o provoca que algunhas aplicacións perdan moitas das súas funcionalidades ao adaptarse a Mountain Lion.