Unha aplicación de Microsoft permite ás persoas con problemas de visión ver co móbil

Dende hai bastantes anos Microsoft quere axudar ás persoas con eivas visuais tirando proveito da intelixencia artificial dende o móbil, para o que lanzou a aplicación Seeing AI para o iPhone, e que finalmente dá o salto a Android, facilitando que tanto persoas cegas como con baixa visión poidan empregar o seu smartphone como axuda no seu día a día para tarefas como describir o contorno, ler o correo ou escoitar as características de obxectos, fotografías ou persoas.
Seeing AI para Android incorpora novas funcionalidades, como as últimas capacidades da IA xenerativa de Microsoft (cunhas descricións máis detalladas das fotografías e a posibilidade de chatear ou facer preguntas concretas sobre os documentos escaneados).
Esta aplicación, que mellora substancialmente a autonomía de persoas con problemas de visión, pode ler directamente texto curto cando aparece diante da cámara do móbil, ler documentos en voz alta, escanear códigos de barras para achegar información sobre os produtos, describir o contorno, recoñecer cartos, identificar cores, ler texto manuscrito e incluso indicar a luminosidade do contorno mediante un ton audible.
Seeing AI está dispoñible en 18 idiomas (entre os que figura o español) e pretende chegar a 36 idiomas o ano que vén. Grazas a estrear versión para Android esta útil ferramenta está dispoñible para os máis de 3 mil millóns de usuarios que ten tal sistema operativo móbil a nivel mundial.