Unha xornada na Coruña dará conta de trucos para axilizar o traballo con Android Studio

O Coruña Android Developer Group xa conta co seu primeiro relator para o Android Developer Monthly Meetup que terá lugar o vindeiro 10 de marzo ás 19:00 horas na sede de MANS - Fundación Paideia no Polígono de POCOMACO (parcela D22), que non será outro que Saúl Molinero, desenvolvedor Android en Popsy, a quen moitos lembrarán pola súa participación na creación do xogo de realidade aumentada War of Sides.
Saúl Molinero comentará distintos trucos que agocha Android Studio e que poden resultar de grande utilidade para o desenvolvemento de aplicacións. Destacará os atallos máis prácticos que presente o IDE desta ferramenta de desenvolvemento, buscando axilizar o traballo diario na creación de aplicacións móbiles.
Tras a xornada haberá pizza e cervexa por cortesía de Mobgen, multinacional do desenvolvemento de aplicacións que conta cunha delegación na cidade da Coruña.