Valve vende unidades reacondicionadas da Steam Deck

O concepto de consola portátil para xogos de PC de Steam sorprendeu polo seu éxito comercial, facendo que durante os seus primeiros meses a Steam Deck non fose capaz de atender á demanda e tardase uns 9 meses en poder adquirirse sen reserva.
Pero esta máquina xa ten certo tempo, e xa hai alternativas máis potentes, aínda que a un prezo máis elevado, de aí que resulte moi interesante a nova posibilidade que Valve ofrece para facerse cunha SteamDeck: as unidades reacondicionadas certificadas.
Valve está a ofrecer consolas Steam Deck usadas, que foron reparadas e revisadas, de xeito que ofrecen unha experiencia igual á de unidades novas, aínda que poden ter algunha pequena marca de uso, e en compensación o consumidor benefíciase dun desconto do 20%, facendo bastante atractiva a compra dunha Steam Deck. Temos así o modelo con 64 GB de almacenamento a 339 euros (aínda que cómpre lembrar que este modelo ten un almacenamento eMMC, polo que non é unha compra recomendable), mentres que os modelos con 256 e 512 GB pasan a custar 439 e 539 euros, facendo máis asumible a compra deste dispositivo que destaca polo seu xigantesco catálogo de títulos dispoñibles e por contar con moitos xogos que certifican o seu bo rendemento neste hardware.