A AMTEGA publica como software libre o seu arquetipo corporativo para o desenvolvemento de servizos web
venres, 16 de novembro do 2018
- O equipo de AMTEGA responsábel da liberación do arquetipo corporativo
O
arquetipo corporativo da axencia AMTEGA, de
cuxa liberación en clave Java falamos o pasado inverno en Código
Cero (salientando os importantes vieiros de re-aproveitamento
deste recurso que se abrían para outras entidades e comunidades de
desenvolvedores), vén de dar hoxe unha nova ración de boas novas. O
motivo? Pois segundo nos conta o equipo da axencia responsábel da
súa liberación en febreiro, agora o programa publícase como
software libre (con licenza como tal) para o desenvolvemento de
servizos web. A axencia AMTEGA habilitouno, a disposición das
comunidades, no
repositorio de Software Libre da Xunta de Galicia.
Segundo
explica a entidade autonómica, o gran obxectivo de ter ceibado o
arquetipo é, ante todo, beneficiar aos desenvolvedores, sexan de
entidades públicas, empresas ou particulares, ampliando e
fortalecendo os seus propios recursos para a creación de novos
servizos. O alicerce da liberación é avanzar nos principios da
reautilización e do coñecemento compartido, amais de na
estandarización. Por outra banda, outro dos obxectivos é facer que
o traballo de liberación das novas ferramentas que xurdan a partir
do programa-esqueleto de AMTEGA, “sexa moito máis áxil e
sinxelo”.
A
axencia tamén confirmou que se trata da segunda iniciativa desta
índole que se leva a cabo dende AMTEGA, sendo a primeira a que
citamos ao comezo deste texto: o ceibado do arquetipo para a
materialización de aplicacións en Java Spring Web.
O
código fonte posto a disposición das comunidades e particulares
incorpora o esqueleto para o desenvolvemento de novos servizos web e
tamén novas versións de compoñentes transversais que se empregan
dentro da AMTEGA e que poden ser reutilizados en moitos casos de uso.
A
axencia, poñéndonos en situación, tamén explica que o arquetipo
pódese entender como un esqueleto base común para a creación de
servizos web, que incorpora un alicerce firme a partir do cal é
posíbel dar forma a funcionalidades máis específicas.
Este
arquetipo xurde como un obxectivo interno de homoxeneizar e
estandarizar todos os servizos web que se desenvolven internamente,
cumprindo tamén cos estándares Java da AMTEGA, o que facilita tamén
o traballo aos provedores tecnolóxicos, e fomentar tamén na
comunidade o desenvolvemento e reutilización de compoñentes
transversais.
A
liberación enmárcase no Plan de Acción en materia de Software
Libre da Xunta de Galicia e contou coa participación da Oficina de
Software Libre da AMTEGA, que elaborou un informe técnico que
garante a viabilidade xurídica da liberación e as condicións nas
que se pode realizar. O Arquetipo publícase cunha licenza libre
ASLv2 (Apache Software License version 2) e tamén baixo a EUPL
(European Union Public License).