Até 57 dinamizadores darán asesoramento TIC aos concellos lucenses adheridos a Innova-TE
luns, 27 de outubro do 2014
A Deputación
de Lugo presentou novidades importantes acerca do desenvolvemento do
plan Inno-TE. Segundo fixo saber o organismo provincial, até 57
traballadores darán formación e asesoramento en novas tecnoloxías
ao case medio cento de concellos que se sumaron ao dito programa de
introdución ás TIC e á eAdministración, o programa Innova-TE. O
novo labor de asesoramento, sinala a entidade provincial, responde á
propia demanda dos concellos, que queren seguir fomentando o emprego
das ferramentas dixitais aplicadas ao seu día a día, “e tirarlles
o máximo partido”.
Nesta segunda fase do plan, o organismo provincial
reforza o equipo de dinamizadores, que pasan a ser 57. Asemade,
amplíase o seu radio de acción, xa que amais de estar a disposición
das administracións locais, desenvolverán actividades dirixidas
aos veciños en xeral co fin de potenciar o uso das novas tecnoloxías
e amosar como se poden aproveitar todas as súas posibilidades a
nivel persoal e laboral. A previsión é de que comecen a traballar
no mes de novembro e rematen a principios de marzo. Entre outras
actuacións, impartirán un plan de formación de 576 cursos para os
empregados municipais sobre temas como os trámites electrónicos ou
as principais ferramentas web (amais de xestión de portais,
formación xurídica relacionada coas novas tecnoloxías ou posta en
marcha de sedes electrónicas), axudarán aos concellos a resolver
incidencias nos seus equipos e nas súas redes e organizarán
xornadas para abordar cuestións como as vantaxes e usos da
eAdministración ou o comercio electrónico. A idea é chegar con
esta última actuación a uns 5.000 veciños aproximadamente.
Segundo explica a Deputación, este novo servizo
está cofinanciado nun 80% por fondos europeos a través do plan
Innova-TE, polo tanto “a custe cero para os 48 municipios
beneficiados”.
Como lembraremos, o
Plan Innova-TE foi presentado en 2010 co obxectivo fundamental de
contribuír á dixitalización de boa parte dos servizos públicos
que achegan os concellos da provincia. Tivo un orzamento de
partida de 9 millóns de euros achegados nun 70 por cento con fondos
FEDER e nun 30 por cento por parte da Deputación de Lugo. Na súa
orixe, o obxectivo foi o de inverter a situación de desvantaxe na
que se atopaba daquela a provincia con respecto a uso das novas
tecnoloxías. A iniciativa do organismo provincial dirixiuse pois a
promover, mediante a Administración Electrónica, avances
tecnolóxicos e sociais, situando á Lugo como un territorio
plenamente inserido na Sociedade da Información.