Bricolabs prepara, coa colaboración de Ghandalf, a súa nova edición das xornadas sobre hardware libre na Coruña

Para aqueles que non o saiban, non só hai software, tamén hai hardware libre. Falamos de equipamentos ceibes de licenzas pechadas que achegan unha incrible marxe de manobra, xa que na súa natureza mesma vai implícita a adaptación a múltiples obxectivos, funcións, tecnoloxías, usos e intereses. Destas cuestións teñen un amplo coñecemento as nosas asociacións ligadas aos programas abertos, asociacións como GHANDALF, que o ano pasado por estas mesmas datas convidounos a participar na primeira edición da OSHWDEM, xornadas de hardware libre na Coruña. Pois ben, esta semana soubemos que vai haber segunda parte. Así nolo contan Bricolabs (a entidade organizadora) e a dita asociación (entidade colaboradora), que queren facer da nova edición do encontro (e das que veñan) un evento de referencia en todo o que teña que ver co Open Source Hardware (OSHW).
A cita será no Centro Cultural Ágora de A Coruña o sábado 30 de novembro e o domingo 1 de decembro. Trátase dun evento de especial relevancia para todos os interesados en Open Source Hardware, en Arduino, nas impresoras 3D, en GNU/Linux embebido, en montaxe de circuítos electrónicos, nos robots ou na electrónica en xeral. Segundo nos recordan os organizadores e lembra Mancomún, haberá charlas, obradoiros, espazos de exposición, proxectos persoais, demostracións, concursos e agasallos. E engaden: “Todo de forma libre e gratuíta, pensado para todas as idades, tanto para expertos como para aqueles que queiran coñecer o movemento faino ti mesmo”.
A entrada para a OSHWDEM é de balde, aínda que polo aforo e para participar nos concursos é preciso inscribirse previamente no o formulario de inscrición da páxina do evento. Os interesados en participar nesta xornada cun espazo de exposición teñen aberto o Call4Makers!. Para estar ao tanto de todas as novidades dende a organización recomenda seguir a súa conta de twitter @OSHWDem. Por certo que actividade forma parte das actividades que a asociación GHANDALF desenvolve ao abeiro do convenio de colaboración asinado coa Axencia para a Modernización Tecnolóxica de Galicia (AMTEGA), e incluídas no Plan de Acción de Software Libre 2013 da Xunta de Galicia.