Google Duo amplia as videoconferencias en grupo ata 12 participantes

En 2016 Google abriu ao público a aplicación de videoconferencia móbil Duo, que un par de anos despois estreou a funcionalidade de videoconferencias en grupo, que permitía conversas de ata 8 persoas á vez, e ante a demanda deste tipo de comunicacións durante os tempos de reclusión doméstica decidiron ampliar este número, de xeito que agora será posible congregar ata 12 persoas nunha conversa a través da aplicación dispoñible para Android e para iOS.
Cómpre lembrar que aínda que un número moi elevado de participantes nunha conversa de vídeo pode ser complicado de xestionar, outras aplicacións permite volumes de usuarios bastante superiores, de xeito que o FaceTime de Apple admite ata 32 usuarios, o Skype de Microsoft acepta ata 50 usuarios na versión persoal (e 250 na versión corporativa) e o Hangouts Meet permite ata entre 100 e 250 participantes (en función da versión de G Suite que teñamos). Ou sexa, que son moitas as plataformas que permite comunicarnos en grupo, de xeito que xuntanzas relativamente grandes que ata o momento realizabamos en persoa poden realizarse en remoto de xeito doado, o que pode resultar de utilidade para o traballo, a docencia ou, simplemente, para manter o contacto entre amigos e familiares.