Mañá bota a andar Mundos Digitales na cidade da Coruña

Esta mañá presentouse aos medios a 16ª edición do congreso internacional Mundos Digitales que dende mañá e ata o sábado acollerá no recinto de PALEXCO na cidade da Coruña a centos de profesionais da creación dixital en moitos dos seus ámbitos, presidindo o acto de presentación o alcalde da cidade, Xulio Ferreiro, quen estivo acompañado polo reitor da UDC, Julio Abalde; o director de Mundos Digitales, Manuel Meijide; e a directora da AMTEGA, Mar Pereira, quen recoñeceu o enorme potencial do sector dos contidos dixitais polas súas múltiples aplicacións ao resto dos sectores produtivos, tanto na modernización e innovación do sectores audiovisual, dos contidos culturais e do entretemento como pola capacidade de dinamizar ámbitos como o turismo, a educación ou a sanidade.
Pereira quixo lembrar que, desde esta perspectiva, a Xunta en colaboración cos Clústers Audiovisual e Tecnolóxico de Galicia puxo en marcha o Programa Viraxe TIC para posicionar á nosa comunidade no ámbito innovador dos contidos dixitais. Entre as súas iniciativas está en marcha a elaboración dun estudo para identificar as principais oportunidades de negocio neste ámbito e analizar as perspectivas do sector ante as novas tendencias, para así establecer un punto de partida para nun futuro apoiar proxectos de innovación tecnolóxica neste eido, establecendo mecanismos que incentiven o desenvolvemento dos novos produtos e servizos conxuntos entre o sector tecnolóxico e audiovisual galego.
A responsable da AMTEGA destacou que as novas tendencias dixitais están dando lugar a un xurdimento continuo de novos perfís profesionais e, polo tanto, de novas oportunidades e demandas laborais ás que é preciso dar resposta. Pereira lembrou que este é un dos obxectivos da Axenda Dixital de Galicia, que contempla medidas para impulsar o talento tecnolóxico na Comunidade, desenvolvemento de actuacións conxuntas cos Colexios profesionais e a Consellería de Cultura, Educación e Ordenación Universitaria para impulsar vocacións tecnolóxicas e aliñar as capacidades dixitais dos profesionais galegos coas demandas do tecido empresarial.
O reitor da UDC salientou pola súa banda as oportunidades que un evento como Mundos Digitales abren a estudantes de varias das súas titulacións (como Comunicación Audiovisual e Enxeñaría en Informática), mentres que o alcalde coruñés quixo destacar o rol da cidade na historia do audiovisual galego, entendendo así que a celebración de encontros deste tipo transcorre de xeito natural pola senda que transita A Coruña dende hai décadas.
Segundo explicou o director de Mundos Digitales, esta cita congrega na Coruña a profesionais de ámbito nacional e internacional do mundo da animación, a realidade virtual, os videoxogos e a arquitectura dixital, ten nesta 16ª edición a máis de 650 participantes rexistrados que asistirán a relatorios, obradoiros, entre outras actividades como unha feira de emprego ou unha exposición de proxectos innovadores e creativos e, por primeira vez na historia deste encontro, contará con actividades paralelas abertas ao público xeral, como a xornada Out of the Box e un par de obradoiros para cativos organizados polo CPEIG.