O software libre abrangue a cuarta parte do catálogo ModaTIC.gal

O catálogo ModaTIC.gal, do que falamos hai pouco en Código Cero con motivo da súa presentación en Santiago, acubilla notable presenza de tecnoloxías libres e metodoloxías de traballo abertas. Así nolo conta Mancomún, facendo referencia a que a porcentaxe de open source no dito repositorio é do 25%. Isto significa, entre outras cousas, que a cuarta parte das ferramentas que se inclúen no catálogo, foron desenvolvidas, en forma, fondo e metodoloxías, con recursos abertos, ao que cómpre engadir que, en base a isto, teñen o seu miolo aberto para que, en caso de adquirilas, poidamos adaptalas ou mudalas en base ás nosas necesidades particulares. Asemade, están ceibas de licenzas pechadas e, polo tanto, de posible pagamento pola adquisición ou renovación das mesmas.
O catálogo ModaTIC.gal, que segue o ronsel do MapaTIC.gal (o punto de encontro virtual da oferta e a demanda tecnolóxicas de Galicia.), pero con aplicacións específicas no eido da moda e o téxtil, contou para a súa elaboración coa Asociación Galega de Software Libre (AGASOL) e con outras entidades galegas análogas como AGESTIC, o Cluster TIC, EGANET, INEO, Vindeira e o Cluster Téxtil Moda. Esta primeira edición inclúe 40 empresas TIC e 5 axentes de innovación que ofrecen en conxunto máis de 70 solucións e servizos tecnolóxicos. Como dixemos das empresas que concorren, o 25% ofrecen solucións abertas, o que supón o 20% das solucións totais recollidas. As solucións libres recollidas son sobre todo plataformas de comercio electrónico dirixidas ao sector téxtil baseadas en Magento ou Prestahop, cos seguintes provedores tecnolóxicos: AVA Soluciones Tecnológicas, Hacce Soluciones TIC, Primate, Queres Tecnologías S.L., Redegal e Wireless Galicia. Ademais, informa Mancomún, Itelsis ofrece SugarCRM como solución de xestión empresarial e relación cos clientes; Igalia un prototipo de catálogo de tenda en escaparate e Pexego un innovador catálogo de pedidos on e off-line. A maiores, Nasas Social & Media fornece solucións de seguimento e promoción en liña dos seus produtos, entre outras cousas (como un xogo para Facebook para a creación de concursos).