RedEmprendia xunta en Compostela aos responsábeis de emprendemento de 21 universidades

Este mércores 15 reúnense na Universidade de Santiago os responsábeis en materia de transferencia de I+D, innovación e emprendemento de 21 institucións de educación superior de España, Portugal e América Latina asociadas a RedEmprendia. Trátase, máis polo miúdo, dun encontro entre vicerreitores e vicerreitoras das universidades que forman a devandita rede universitaria. A xuntanza desenvólvese a partir das 10.00 horas no Centro de Estudos Avanzados da USC (Finca Vista Alegre), e entre as numerosas cuestións a tratar salienta a presentación do documento estratéxico RedEmprendia Horizonte 2020.
Este documento, sinala a Universidade de Santiago, guiará as accións da rede nos vindeiros cinco anos e marcará os programas e liñas mestras a desenvolver para apoiar o emprendemento universitario innovador e de alto potencial. Na mesma xuntanza, que abre o reitor Juan Viaño, preséntase o informe Educación Superior en Iberoamérica 2015: A transferencia en I+D, a innovación e o emprendemento nas universidades. Pola tarde, o mesmo centro acollerá o seminario O crowdfundig: unha excelente ferramenta para a posta en marcha e financiamento de iniciativas emprendedoras, impartido por Javier Martín, emprendedor e editor de Loogic.com, portal de referencia no ámbito estatal sobre startups.
Sinalar que o encontro deste 15 de abril dará paso á xuntanza semestral do Comité Técnico de RedEmprendia, a desenvolver tamén no Centro de Estudos Avanzados os días 16 e 17, reunindo técnicos en investigación e emprendemento de máis dunha vintena de universidades de España, Portugal, México, Chile, Arxentina, Brasil e Colombia.
RedEmprendia é unha rede universitaria orientada á transferencia de I+D e á posta en marcha de iniciativas de mercado innovadoras, que traballa de modo colaborativo tanto para os seus asociados como para dinamizar o denominado Espazo Iberoamericano do Coñecemento. O seu presidente é o profesor da Universidade de Santiago Senén Barro. A rede conta con Banco Santander e Universia, como socios estratéxicos.