A USC presenta un curso para estender o uso das novas tecnoloxías no noso agro
xoves, 22 de maio do 2014
- Villada, Bueno, Carreira e Vázquez, na presentación do curso na Escola Politécnica Superior
A Universidade de Santiago presentou este mércores
un curso de verán encamiñado a introducir innovación tecnolóxica
onde, polos motivos que sexan (o peso da tradición, a falta de
infraestruturas axeitadas e de compromiso tecnolóxico por parte de
administracións e empresas), a innovación tecnolóxica non chegou
aínda de xeito xeral e uniforme. Falamos do ámbito das nosas
explotacións agrogandeiras. O
curso desenvolverase do 14 ao 19 de xullo na Casa da Cultura do
concello da Pastoriza. Contará coa presenza de 20 relatores,
pertencentes sobre todo ao eido universitario e investigador.
Os temas a tratar serán as novas tecnoloxías e o
seu potencial de aplicación na actividade do noso agro, os sistemas
de guiado de máquinas vía satélite, a xestión informatizada de
parques de maquinaria, a robótica e as técnicas e sistemas
innovadores no muxido de vacún de leite. Tamén se abordarán
cuestións como as vantaxes dos dispositivos sensoriais para a
análise de calidade en colleitadoras de forraxe. O seminario,
abeirado na oferta de cursos da Universidade de Verán 2014, vén da
man de Javier Bueno Lema, quen fixo saber durante a súa presentación
que os seus obxectivos son ante todo “modernizar a imaxe
tradicional asociada de sempre ao sector agrongadeiro, malia a
constante incorporación de tecnoloxías de última xeración”.
Asemade, tamén se pretende divulgar entre estudantes e profesionais
as innovacións tecnolóxicas máis novas “que xa se están a
aplicar nun sector dinámico e que pode presentar múltiples e
atractivas oportunidades no horizonte laboral”, sinalou.
O director do curso, que inclúe sesións prácticas
e demostracións, ademais de visitas a tres explotacións da
Pastoriza na mañá do 20 de xullo, salientou tamén “a necesidade
de formación superior en Enxeñaría Agronómica para poder
aconsellar ás explotacións agrarias na incorporación das
innovacións tecnolóxicas, formación na que a Escola Politécnica
Superior de Lugo é un referente en Galicia”.
No acto de presentación tamén participaron a
tenente de alcalde de A Pastoriza, Elba Carreira, o tamén edil
pastoricense Eloi Villada e o presidente de Agamac, Marcos Vázquez
Marey. O prazo de matrícula
deste curso de verán da USC, que conta con cofinanciamento do
Concello de A Pastoriza e das empresas John Deere Ibérica S.A. e
Durán Maquinaria Agrícola S.L. permanecerá aberto ata o vindeiro 4
de xullo na páxina web da Universidade
de Santiago. Asemade, as persoas interesadas tamén poden
consultar ampla información sobre o programa deste curso, que será
recoñecido por dos créditos ECTS para os estudantes da USC, na
páxina web www.explotacionsgandeiras.com.