AMTEGA organiza o 11 de xuño a III edición de Somos Cibernéticas

A xornada Somos Cibernéticas celebra o vindeiro día 11 a súa terceira edición co obxectivo de fomentar o talento feminino no eido da ciberseguridade. A Axencia para a Modernización Tecnolóxica (AMTEGA) organiza este encontro, no que participarán arredor de medio cento de rapazas de 4º da ESO que terán que afrontar catro desafíos en materia de ciberseguridade, propostos por catro especialistas neste ámbito e vinculados a mulleres relacionadas co mesmo.
A xornada comezará con reto Alerta WiFi: redes ao descuberto, no que as participantes terán que crear unha rede sen fíos Wi-Fi maliciosa para “comprobar como os ciberdelicuentes conseguen as credenciais do usuarios”.
No segundo reto, Cazadoras de trampas dixitais, as rapazas terán que evitar ser vítimas de phishing (suplantacións en liña de identidades).
O terceiro desafío, Gardiás dixitais: fortalecendo as defensas, afondará na importancia de empregar contrasinais seguros e o último reto, Raiñas do ciberespazo: misión impostor, centrarase na detección de novas falsas en internet.
As profesionais que lanzarán os desafíos son Olalla Rama, enxeñeira informática e responsábel de análises de vulnerabilidades de Telefónica Tech; Conchi Fernández, enxeñeira de Telecomunicacións e responsábel de dispositivos de Telefónica Tech; Alba Ramos, enxeñeira de Tecnoloxías de Telecomunicacións e consultora tecnolóxica de Govertis; e Lidia Molina, licenciada en Dereito, especializada en novas tecnoloxías e protección de datos e consultora tecnolóxica de Govertis.
O encontro rematará co relatorio Rompendo barreiras: o talento feminino en ciberseguridade, que impartirá Belén Pérez, enxeñeira técnica industrial e coordinadora do Centro de Ciberseguridade industrial en Galicia. Calquera persoa interesada poderá seguir o evento en streaming previa inscrición no portal do GaiásTech.
Esta xornada enmárcase nas actividades do Nodo CIBER.gal, un espazo de colaboración público-privado, impulsado pola Xunta favorecer unha contorna dixital segura e afrontar, de forma colaborativa, os retos aos que se deben enfrontar empresas, cidadáns e administracións para protexer os seus activos no ciberespazo.