Até 2.275 alumnos poderán participar no novo programa DixitalWeek
luns, 4 de xullo do 2022
A
Consellería
de Cultura e Educación vén de abrir o prazo para que os centros
educativos sostidos con fondo públicos soliciten participar no novo
programa formativo inmersivo DixitalWeek. Trátase dunha
iniciativa para posibilitar que un total de 2.275 alumnas e alumnos
de 6º de Primaria e ESO melloren as súas competencias en
comunicación lingüística en inglés e dixitais.
A
actividade desenvolverase durante o primeiro trimestre do curso
escolar 2022/23 no Albergue Xuvenil de Gandarío (Bergondo, A Coruña)
en quendas dunha semana de duración en réxime de internado.
Esta
acción enmárcase tanto na Estratexia Galega de Linguas Estranxeiras
2030, EDUlingüe, como na Estratexia Galega de Educación Dixital
2030. O seu obxectivo é a práctica do idioma e o seu uso en
contextos comunicativos diversificados e enfocados cara á mellora
da comunicación oral a través de actividades dixitais, co apoio de
profesorado nativo en lingua inglesa. “Búscase así mellorar a
competencia a través de accións tecnolóxicas e outras
complementarias que promovan a actividade física e a socialización”,
sinalan dende Educación.
O
prazo de presentación de solicitudes estará aberto ata o vindeiro 9
de setembro e deberá realizarse a través da aplicación informática
correspondente. O departamento educativo da Xunta de Galicia destina
ao desenvolvemento deste programa, que será gratuíto para as
familias, un orzamento de 819.000€.