Entregados no Parlamento os Premios Publicidade en Galego, edición 2021
luns, 22 de marzo do 2021
O
Parlamento de Galicia acolleu este 22 de marzo a entrega dos Premios
Publicidade en Galego 2021, uns recoñecementos dirixidos a
distinguir as máis relevantes contribucións á actividade
publicitaria na nosa terra e, máis polo miúdo, a creatividade dos
anuncios en calquera formato achegados na nosa lingua. Na cita
participou o conselleiro de Cultura, Educación e Universidade, Román
Rodríguez.
Durante
a entrega, na que tamén interviñeron o presidente do Parlamento de
Galicia, Miguel Ángel Santalices, e o presidente do Foro Enrique
Peinador, Xosé González Martínez, o titular de Cultura avanzou que
a Xunta de Galicia está traballando para que o galego poida estar
presente en todos os ámbitos da publicidade, para o cal estase
analizando a situación en Internet.
Os
Premios de Publicidade en Galego 2021 recoñeceron na edición deste
ano as campañas e accións publicitarias feitas por Ecovigo para
Hidrotec-Tecnología del agua, por Neozink para o Grupo Cuevas, por
100x100 Creatividade+Comunicación para o Colexio Oficial de
Psicoloxía de Galicia e por &Rosás para Martín Codax. Na
modalidade de centro educativo as galardoadas foron unha alumna e
unha profesora do instituto IES Leixa de Ferrol, mentres os
laboratorios Zeltia recibiron a mención de honra.
Os
galardóns veñen cada ano da man da Consellería de Cultura e
Educación (Secretaría de Política Lingüística), o Parlamento
Galego e o Foro Enrique Peinador. Incluíronse nesta convocatoria
cinco categorías: radio, televisión, Internet, prensa escrita e
centros de formación. O prazo de inscrición rematou o 30 de
decembro.
Na pasada edición, resultaron premiados os proxectos
Benvidos novos Larseiros!, da empresa Larsa e a axencia BAP
Conde; Martín Códax, Fillo do Atlántico, da empresa
Martín Códax e a axencia &Rosás (con dous galardóns, na
categoría de televisión e de prensa); Queixos Hoxe, da
Cooperativa HOXE e a axencia Pío García Audiovisuais, S.L., e
Stop_Bullyng, do IES Leixa de Ferrol (A Coruña).