A UVigo participa nunha rede internacional para favorecer o acceso a contidos educativos dixitais
mércores, 26 de xuño do 2013
A Universidade de Vigo
acolleu a presentación da Rede
Iberoamericana para a Usabilidade de Repositorios Educativos (RIURE),
unha iniciativa posta en marcha ao abeiro do programa CYTED e que se
dirixe, entre outras cousas, a
traballar a prol dun ensino en liña máis accesíbel, completo e
sinxelo de atopar. A rede, que nun principio terá actividade
durante catro anos, está constituída por 48 tecnólogos e pedagogos
de sete grupos de investigación e dúas empresas de España,
Portugal, Brasil, Arxentina, Uruguai, Ecuador e Perú. Xuntos crearán
as ferramentas precisas para facilitar a procura dos contidos
educativos dixitais e o seu posterior uso na ensinanza primaria,
secundaria ou universitaria. A idea non crear máis repositorios,
senón quitarlles todo aquilo que os faga invisíbeis ou
inaccesíbeis para un membro calquera da comunidade educativa.
Sacarlles, en definitiva, a palla da linguaxe excesivamente
tecnolóxica e amosar o seu miolo e o seu potencial.
Segundo explica Martín
Llamas, un dos investigadores que participará no proxecto por parte
da UVigo (coordinadora e líder de RIURE), os repositorios funcionan
como unha base de datos na que se almacenan contidos dixitais creados
por profesores, editoriais, universidades, empresas… que axudan a
divulgar a produción intelectual dos traballadores de distintas
institucións. “O problema” di, “é que no
caso dos educativos eran empregados até o de agora
principalmente por profesores con certos coñecementos e
inquietudes, de aí a necesidade de mellorar a usabilidade e ampliar
así o tipo de público que os utiliza sen que teñan a necesidade de
aumentar os seus coñecementos técnicos”.
Nas primeiras xuntanzas
da Rede, informa a UVigo, os parceiros deseñarán as estratexias,
establecerán as accións a desenvolver, repartirán os paquetes de
traballo e, en definitiva, debuxarán o futuro dun proxecto
“fundamental dende o punto de vista da Universidade de Vigo”,
como salientou o vicerreitor de Extensión Universitaria e Relacións
Internacionais, Manuel Fernández Iglesias, para quen ser o líder
desta iniciativa permite “non só ter información de primeira
man sobre calquera avance que haxa, senón tamén exercer de socios
de confianza para futuros proxectos relacionados coa xestión de
contidos educativos”.