O CPETIG achega formación para impulsar na nosa terra a figura do Delegado de Protección de Datos
luns, 3 de setembro do 2018
O
Colexio Profesional de Enxeñaría
Técnica en Informática de Galicia (CPETIG) vainos achegar os
días vindeiros aos desafíos que nos abre o novo regulamento de
protección de datos, poñendo o foco nas oportunidades profesionais
que veñen da man deste novo estado de cousas, máis controlado,
específico e rigoroso. Nesta liña insírese
o seu curso especializado sobre a figura do Delegado de Protección
de Datos, o DPO, que se vai desenvolver en colaboración coa axencia
AMTEGA. A actividade desenvolverase na Cidade da Cultura en dúas
fins de semana consecutivas deste mes de setembro, os días os días
7, 8, 14 e 15 de setembro.
O
curso, de 20 horas de duración, celebrarase en horario de tarde para
as sesións dos venres e de mañá para as sesións dos sábados.
Impartido
por profesionais do Centro de Formación de AENOR, os contidos poñen
o foco nos fundamentos e principios da nova regulamentación de
protección de datos, nos dereitos das persoas interesadas, nas
obrigas dos responsábeis do tratamento de datos e nas medidas de
seguridade, así como no estatuto da figura do Delegado de Protección
de Datos, DPO, nas autoridades de control e no réxime sancionador.
O
curso, en definitiva, vai ofrecer unha visión xeral da normativa
europea de salvagarda da información, incidindo en aspectos
prácticos para as entidades con competencias e responsabilidades en
tratamento de datos. Entre outros obxectivos, o curso concibiuse para
coñecer os principios básicos da nova normativa, cunha análise
detallada das obrigas que afectan ás entidades públicas e privadas
implicadas; e afondar nas funcións do DPO, acadando o nivel de
coñecemento preciso para poder levalas a cabo.
Segundo
o CPETIG, esta formación vai dirixida sobre todo a persoas que teñan
entre os seus cometidos velar pola seguridade e o cumprimento
normativo, auditores internos ou externos que deban avaliar a
observancia da normativa, consultores, avogados e, en xeral, a
profesionais interesados en prestar servizos neste ámbito.
Oportunidade
do curso
O
colexio que preside Marcos Mata, a respecto do marco no que se insire
a actividade, informou hoxe que a formación a subministrar está
aliñada co esquema de certificación da Axencia Española de
Protección de Datos e concibida para que calquera persoa que desexe
certificarse como DPO poida facelo, aínda que non teña experiencia.
O CPETIG tamén recoñece que a organización deste curso responde á
crecente demanda do novo perfil profesional do DPO, cuxa figura e
funcións veñen determinadas no RGPD. Entre outros cometidos, este
novo perfil profesional ten a responsabilidade de informar e asesorar
á empresa e aos empregados sobre as súas obrigas no tratamento dos
datos, supervisar o seu cumprimento e actuar de interlocutor entre a
empresa e as persoas propietarias dos datos, ao obxecto de que estas
poidan exercer os seus dereitos.
No
que atinxe aos ámbitos de esixida presenza do DPO, a entidade
profesional galega lembra que “de forma obrigatoria” deben
incorporar a figura de DPO no seu organigrama as organizacións
públicas, as empresas que realizan tratamento masivo de datos ou a
gran escala, as que traten datos de especial protección, como poden
ser datos xenéticos, relativos á saúde, biométricos, etc, “e as
empresas que recollan características psicolóxicas e de
comportamento das persoas”.
O
prezo do curso de DPO é de 600€, cunha bonificación do 50% para
as persoas colexiadas e precolexiadas. Máis información e
inscricións na web do CPETIG.