Os expertos de Territorios Creativos avogan por unha aposta atlántica común a prol da innovación e o patrimonio
xoves, 27 de xuño do 2013
Ourense
acolle estes días (xoves e venres) no Centro Cultural Marcos
Valcárcel unha xuntanza de diferentes países europeos, co nexo
común do seu substrato atlántico, baixo o nome de Conferencia
Internacional sobre Territorios
Creativos.
O evento, que na primeira xornada contou coa asistencia de máis de
medio cento de profesionais das industrias culturais dos catro pobos
participantes (Gales, Norte de Portugal, Galicia e
Poitou-Charentes/GrandAngoulême),
está incluído
dentro do programa Imagina
Atlántica,
que pretende pór en valor a riqueza cultural destas áreas
xeográficas e darlle a difusión merecida mediante a innovación e a
creatividade ao servizo do audiovisual, a animación, a banda
deseñada ou as aplicacións TIC. Logo da inauguración a primeira
hora
(da
que xa dimos conta en Código Cero), a xornada proseguiu cun bo
número de presentacións sobre diferentes traballos de
desenvolvemento local, presentacións que coincidiron todas elas no
seguinte punto: cómpre unir forzas entre os profesionais da
industria cultural das ditas áreas para facer o que ninguén vai
facer por elas, que é deixar de ser contornas periféricas no
sentido produtivo (no cultural e na presenza de identidade propia,
nunca foron periféricas).
Como
dixemos, o
evento reúne en Ourense a un grande número de profesionais do
audiovisual, a ilustración e as novas tecnoloxías. Código Cero
puido asistir ás intervencións de recoñecidos expertos na materia
como por exemplo Xavier
Hurteau, director xeral delegado de GrandAngoulême, quen ao igual
que o resto dos relatores avogou claramente por traballar ombro con
ombro, máis aínda que até o de agora, e por facer esforzos
realmente firmes por pasar dos ditos aos feitos. Só desta maneira,
sinalou, poderemos ir máis lonxe na posta en valor de todo o que
atesouramos, que é moito e que se materializa nunha chea de ámbitos:
arte, arquitectura, cultura, paisaxe, identidades propias e
definidas, potencial turístico, etc. Hurteau tamén se amosou
partidario de facer o máximo fincapé na formación e expuxo
exemplos disto postos en marcha en Angoulême, tanto no eido da imaxe
coma da banda deseñada (de feito, a cidade francesa é a capital
europea do cómic), a animación ou os videoxogos. Ao seu xuízo,
“cómpre
resistir perante a competencia das áreas máis poboadas e mellor
situadas”,
e para isto é imprescindíbel crear identidade, contar historias, co
fin de que haxa máis turistas que nos descubran. Na súa opinión,
as novas tecnoloxías son unha oportunidade clara para diferenciarnos
dos outros.
Outro
experto en innovación, desenvolvemento local e patrimonio ao que
tivemos ocasión de escoitar no congreso de Ourense foi Xesús Lage,
docente da Universidade de Vigo e responsábel do Grupo Territorios
Creativos do proxecto Imagina
Atlántica,
quen adicou a súa intervención a amosar o potencial de traballo
conxunto das áreas xeográficas incluídas na iniciativa e, tamén,
a achegar unha serie de recomendacións para que os resultados do
dito labor sexan aínda máis eficaces. Segundo explicou, o traballo
do seu grupo é máis cualitativo que cuantitativo, centrándose en
recabar información detallada sobre os referentes propios dos catro
pobos, cadansúas identidades, e como se comunican eses referentes
(no caso galego-portugués, as ligazóns son moitas e variadas e
veñen de moi antigo). O grupo de traballo, dixo, ten constatado o
alto valor creativo atribuído ao audiovisual, ao multimedia, ao
patrimonio e ao turismo. Estes sectores, comentou, contribúen a
diversificar a economía dos países, a promover o emprego (moi
cualificado e xuvenil), a innovación tecnolóxica que aposta polo
patrimonio e a identidade (nos catro países participantes hai
grandes exemplos disto, manifestou). “As
catro áreas”,
engadiu, “teñen
un enorme e rico patrimonio con características propias, e isto é
algo que está a inspirar creatividade e innovación, e sen renunciar
á influencia positiva de correntes multiculturais actuais”.
Na súa opinión, as TIC facilitan o traballo colaborativo, pero é
importante xerar antes proxectos como Imagina
Atlántica,
que favorezan a confianza para logo traballarmos xuntos, en liña.
Estas industrias, afirmou, atesouran gran capacidade para seren
flexíbeis, moito máis ca outros sectores, máis inmobilistas fronte
á crise produtiva. Un exemplo disto é o que acontece no Norte de
Portugal, explicou, onde malia o clima imperante de recortes estase a
xerar un auténtico boom
de
creatividade.